މިދިޔަ އަހަރުގެ އޭޕްރީލް މަހުން ފެށިގެން ދުނިޔޭގައި ހަލުއިކަމާއެކު ފެތުރެންފެށި އިންފްލުއެންޒާ އޭ- H1N1 (ސްވައިން ފްލޫ) އިންސާނުންގެ މެދުގައި ގައިންގަޔަށް އަރާ ބައްޔެއްގެ ގޮތުގައި ފެތުރޭ އިންފްލުއެންޒާ ޕެންޑަމިކަކަށް ބަދަލުވެ، ރާއްޖޭގައި މި ޕެންޑަމިކް ލެވެލް 4 ގައި އޮތުމަށްފަހު މިއަދުން ފެށިގެން ލެވެލް 6 އަށް ބަދަލުކުރެއްވުމަށް ނެޝެނަލް އިމަރޖެންސީ އޮޕަރޭޝަނުން ނިންމަވައިފިއެވެ.

އެލަރޓް ލެވެލް 6 ށް ގެނައުމަށް އެ ސެންޓަރުން ނިންމެވީ ސްވައިން ފްލޫގެ ކަންތައްތައް ބެއްލެވުމަށް ސަރުކާރުން އެކުލަވާލައްވާފައިވާ ހެލްތް ކޮމިޓީން ބޭއްވެވި މަޝްވަރާތަކަކަށްފަހުގައެވެ. ރާއްޖޭގައި ސްވައިން ފްލޫ ޕެންޑަމިކް ލެވެލް 6 އަށް ބަދަލުކުރެވުނީ، މިބަލި ރާއްޖޭގައި ފެތުރޭ މިންވަރު ވަރަށް ބޮޑަށް ކޮންޓްރޯލް ކުރެވި، އަދި ބަލި އިތުރަށް ފެތުރެމުން ނުދާ ކަމަށް އެޕިޑެމިއޮލޮޖިކަލް ތަފާސްހިސާބުތަކުން ދައްކާތާ 1 މަސް ދުވަހުގެ މުއްދަތަށް ބެލުމަށްފަހު، ބައިނަލް އަގްވާމީ ގޮތުން މިބަލީގެ ލެވެލްތައް ކަނޑައެޅުމަށް އެކުލަވާލެވިފައިވާ ޓެކްނިކަލް މިންގަނޑުތަކާ އެއްގޮތްވާ ގޮތުގެ މަތިންނެވެ. އަދި މިއަހަރުގެ ދިރާސީ އަހަރު ފެށުމާ ގުޅިގެން ސްކޫލް ކުދިންގެ މެދުގައި މި ބަލި އިތުރަށް ފެތުރިގެން ހިނގައިދާނެ ކަމަށްޓަކައި، ޓެކްނިކަލްގޮތުން ބަލަންޖެހޭ މުއްދަތުގެ ތެރޭގައި، ކުރިން ހީކުރެވިފައިވާ ގޮތަށް މިބަލި ފެތުރިގެން ގޮސްފައި ނުވާތީއެވެ.

ޕެންޑަމިކްގެ އެންމެ ނުރައްކާތެރި ލެވެލްކަމުގައިވާ ލެވެލް 5 ށް ނުގޮސް މި ރޯގާ ކޮންޓްރޯލް ކުރެވުނީ، ސިއްޙީ ދާއިރާގައި މަސައްކަތްކުރާ ބޭފުޅުންގެ މިންނެތް މަސައްކަތުންނާއި، ސަރުކާރުން މި ރޯގާ ފެތުރުނަ ނުދިނުމަށް ދެއްވި ޚާއްޞަ ސަމާލުކަމުންނާއި، ކަމާބެހޭ ހުރިހާ ސެކްޓަރތަކަކުންވެސް ދެއްވި އެއްބާރުލުމުންނާއި، އަދި ރައްޔިތުންގެ ހޭލުންތެރިކަން އިތުރުވުމުން ކަމުގައި މި މިނިސްޓްރީން ދެކެމެވެ. އެހެންކަމުން މި މިނިސްޓްރިއަށް އެއްބާރުލުން ދެއްވައިގެން މަސައްކަތްކުރެއްވި ހުރިހާ ފަރާތްތަކަށް މި ފުރުސަތުގައި ޝުކުރުއަދާކުރަމެވެ.
މިބަލި ލެވެލް 6 ށް ބަދަލުކުރެވުމާ ގުޅިގެން، ސްވައިން ފްލޫއަށް ފަރުވާ ކުރުމަށް ގާއިމުކުރެވިފައިވާ ފްލޫ ކްލިނިކް މާދަމާއިން ފެށިގެން ބަންދުކުރެވޭނެއެވެ. ނަމަވެސް މިބައްޔާ ގުޅިގެން ކުރަންޖެހޭ ސަރވެއިލަންސް ހުރިހާ މަސައްކަތްތަކެއް ސެންޓަރ ފޮރ ކޮމިއުނިޓީ ހެލްތް ޑިޒީޒް ކޮންޓްރޯލް އިން ކުރައްވަމުން ގެންދަވާނެއެވެ. މިގޮތުން ބަލީގެ ހާލަތު ބަދަލުވެގެންދާ ގޮތަށް ބެލުމަށްފަހު، ޕެންޑަމިކް ލެވެލް ބަދަލު ކުރަން ޖެހިއްޖެ ހާލަތެއްގައި ބަދަލުކުރެވި، އަދި އެ ހާލަތަކާ ގުޅިގެން އަޅަންޖެހޭ ފިޔަވަޅުތައް އަޅަމުން ގެންދާގޮތަށް ވަނީ ހަމަޖެހިފައެވެ. އަދި ކުރިއަށް އޮތް ތާނގައިވެސް މިބައްޔަށް ޝައްކުވާފަދަ ޢަލާމާތްތައް ފެންނަ މީހުން ސްކްރީން ކުރުމާއި ފަރުވާ ކުރުމުގެ ކަންތައް ހަމަޖެހިފައިވާ އުސޫލުތަކާ އެއްގޮތަށް ރާއްޖޭގެ ޞިއްޙީ ފަރުވާދޭ ހުރިހާ ތަނަކުން ކުރަމުން ގެންދާނެއެވެ.

ޕެންޑަމިކް ލެވެލް 6 ށް ބަދަލުކުރެވުމުން އާންމުން ގިނަ އަދަދަކަށް އެއްވެއުޅޭ ތަންތަނަށް ނުދިއުމަށް މީގެ ކުރިން ހެލްތް މިނިސްޓްރީން އިލްތިމާސް ކޮށްފައި އޮތް އޮތުން މިއަދުން ފެށިގެން ވަނީ ދޫކޮށްލައްވާފައެވެ. ނަމަވެސް މިބަލި ފެތުރޭ ޕެންޑަމިކް ލެވެލް 6 ށް ބަދަލުކުރެވުނު ކަމުގައި ވިޔަސް، ބަލި ޖެހުމުން ރައްކާތެރިވުމަށްޓަކައި، ކެއްސާ ކިނބިހި އެޅުމުގައި އަނގަޔާއި ނޭފަތް ނިވާކުރުމާއި، ގިނަގިނައިން އަތްދޮވުން ފަދަ ސިއްޙީ ރަނގަޅު އާދަތަކަށް ސަމާލުކަން ދެއްވުމަށް އަދިވެސް މިމިނިސްޓްރީން އިލްތިމާސްކުރަމެވެ.

21 ޖެނުއަރީ 2010